اعتمدت محكمة جنايات باريس على وثائق وحجج باش حسمات قضية سعد المجرد وادانتو بتهمة الاغتصاب وحكمات عليه بـ 6 سنين دالحبس نهار 24 فبراير 2023.

وخرجات وثيقة الحجج اللي اعتمدت عليها هيئة المحلفين، وجا فيها على انه من بعد التحقيقات اللي دارو والفحوصات لقاو انه فعلا سعد المجرد اغتصب الضحية لورا بريول.

وأفادت الوثيقة ان سعد اعترف ان لورا مشات معاه للغرفة فاالفندق واعترف انهم تبادلو القبل فبيتو “Mariott” وهوما كيتبادلو القبل سعد دفع لورا بعنف على الزربية ولاحها على ظهرها، ومن بعد رفضات تبوسو مزال، وهو زاد عنفها واغتصبها. لورا من بعد خرجات من لاشومبر دوطيل وهربات وتبعها سعد.. وكاينين تصريحات موظفين الفندق الثلاثة اللي تكررت فالجلسة ، وهم بوفير بينوا ، وكليو مارود كزافيي وگدري حياة ، كيقولو انهم شافو لورا كتبكي ومخلوعة بتيشورت مقطع.

وأضافت أن سعد كيعترف فقط بأنه كان شارب الشراب واعترف انه دفع لورا ولكن نفى انه كان إيلاج.

وجاء فالأدلة اللي اعتمد عليها القضاء الفرنسي انه من ناحية الخبرة الجينية اللي تدارت على الحوايج اللي كانت لابسة لورا والجسم ديالها مكانش اثر للحمض النووي ديال سعد المجرد لأن شارت بزاف دالمرات انها معارفاش واش كان قذف اصلا ولالا .

و لكن الخبرة الوراثية كتقول انه عدم وجود صورة وراثية للذكور على المسحات المأخوذة ماشي بالضرورة كتعني انه مكانش ايلاج.

وحسب ماجاء فالوثيقة، انه بالإضافة لهادشي لقاو اثار الكوكايين فالبيت ففندق “الانتركونتيننتال” فاش كان سعد، والتحاليل ايضا بينات ان مستوى الكحول فالدم عند سعد فالوقيتة فاش كانت الحادثة كانت ​واصلة ل 1.35 جرام لكل لتر.

وسلطات المحكمة الضوء على شخصية سعد المجرد على انها شخصية مغرورة غير ناضجة لا سيما على المستوى الجنسي لانه مكانش متعاطف نهائيا مع الضحية لورا.

وبناء على هذا المحكمة تشير فأسبابها إلى “التأثير الواضح للمخدرات اللي اعترف بيها سعد ، وتضيف المحكمة أن سعد مصر انكر الوقائع .